منــــــــــــــتدى ليـــــــــــــــــــــالي

منــــــــــــــتدى ليـــــــــــــــــــــالي

منتدى ﻧﺴﺎﺋﻲ ﻳﻬﺘﻢ ﺑﺸﺌﻮﻥ ﺍﻟﻤﺮﺃﺓ ﺍﻟﻌﺮﺑﻴﺔ ﺑﺸﻜﻞ ﻋﺎﻡ ﻭﺍﻟﻤﺮﺃﺓ ﺍﻟﺴﻮﺩﺍﻧﻴﺔ ﺑﺸﻜﻞ ﺧﺎﺹ ﻭﻳﻐﻄﻲ ﻛﺎﻓﺔ ﺇﺣﺘﻴﺎﺟﺎﺗﻬﺎ ﻣﻦ ﻧﺎﺣﻴﺔ ﺍﻟﺜﻘﺎﻓﺔ ﻭﺍﻟﻌﺎﺩﺍﺕ ﻭﺍﻟﺘﻘﺎﻟﻴﺪ ﻭﺍﻟﺘﻮﻋﻴﺔ ﺍﻟﺼﺤﻴﺔ


    تجربتي في التقديم لمنحة OWSD

    شاطر
    avatar
    سحر الباقر
    مشرفة

    عدد المساهمات : 68
    تاريخ التسجيل : 22/10/2012
    العمر : 38

    تجربتي في التقديم لمنحة OWSD

    مُساهمة من طرف سحر الباقر في الجمعة سبتمبر 23, 2016 7:31 pm

    اليوم حاكتب عن تجربتي في التقديم لمنحة
    OWSD doctoral scholarship program
    المنحة لطلبة الدكتوراه من النساء فقط, اللنك للموقع في أول كومنت.
    - في إعتقادي إن أفضل طريقة للاستعداد للمنح دراسية للدراسات العليا تبدأ بتنظيم الزمن ووضع بجداول لمتابعة سيرالاستعدادات لاني حاولت مرتين وما اتوفقت بسبب لكن الحمد لله اتوفقت في المرة التالتة
    عموما ممكن تقسيم التقديم لمرحلتين المرحلة الأولى الاستعداد و المرحلة الثانية التقديم أونلاين:
    الموقع كل فترة .بيكون منزلين متين حتفتح المنحة الجاية
    المرحلة الأولى الاستعداد ومعرفة مواعيد المنحة والشروط والمستندات المطلوبة
    1. المنحة بتفتح عادة من بداية شهر مارس و حتى نهاية شهر مايو .مرات المواغيد بتختلف من سنة لتانية عشان كدا مهم جدا مراجعة الموقع كل فترة .بيكون منزلين متين حتفتح المنحة الجاية
    2. الشهادات الجامعية والتفاصيل بتاعة البكالريوس و الماجستير ما شرط تكون موثقة لكن بما انو حنستعدي من من بدري احسن تتوثق مامعروف الظروف
    3. تحددي نوع المنحة البتنفع معاك لان كل واحدة فينا ظروفها مختلفة من التانية في البتقدر تواصل 3 سنة بره السودان وكمان العندها اطفال مابتقدر تبعد عنهم فترة طويلة
    المنحة دي نوعين
    * منحة كاملة مدفوعة التكاليف لمدة 3 سنة
    * او منحة جزئية(شاندوتش)(يعني تكوني مسجلة في جامعة في السودان لكن تمشي تشتغلي جزء من البحث بتاعك في معهد اوجامعة بره السودان(معهد مضيف) ودي مفيدة لو جزء من البحث ماممكن يتعمل هنا عشان غالي او الاجهزة غير متوفرة) المنحة الجزئية بيدفعو ليك التذاكر وحق الاعاشة وكل مصاريفك في المعهد المضيف
    *معلومة صغيرة لكن ممكن يكون ليها اثر كبير في الاختيار لان ناس المنحة بيفضلو المنحة الجزئية -شاندوتش
    4. اختيار الجامعة والمشرف وكتابة البربوزل
    في موقع المنحة في قائمة بالجامعات والمعاهد عندهم معاهم اتفاقية ممكن تختاري منهم جامعة وتشوفي مشرفي حسب موضوع البحث بتاعك تراسلية .هنا برضو حاتكلم عن تجربتي الشخصية في اختيار الجامعة في المرة الاولي والتانية كنت برسل للمعاهد الهم خاتنها في اللستة.في المرة الاولي ماجاني اي رد من اي مشرف.وفي المرة التانية جزء منهم ردو لي بانهم ماعندهم خانة فاضية للطالب دكتوراة واحد رد لي لكن كانت شروطه صعبة.المرة التالتة حاولت من بدري وبإصرار
    اخنرت جامعة كم جامعة هم ما خاتنها في القائمة.حتقولو لي اخترتها كيف؟ الموقع فيهو قائمة بالبلاد النامية المسموح ليهم يقدمو للمنحة يلا من الدول دي انا اخترت كم دولة وبديت اشوف الجامعات والمهاعد الفيها واراسلهم ومن الحاجات المهمة جدا وكان ليهل دور كبير في اختيار المشرف حسابي في Linkedin دخلت في حسابي وشفت من قائمة المضافين عندي منو ممكن يكون مشرف لي او ممكن يساعدني اويرشح لي مشرف ماتتخيلو استفدت كيف ووصلت لبروفات ما كان ممكن اوصل ليهم ابدا.وكنت برضو لو لقيت مشرف في اي جامعة قبل ما اراسلو بمشي اضيفهو في حساب Linked
    ياريت كل واحدة تعمل حساب في Linkedin ماحتتخيلو كيف ممكن تستفيدو منه
    البربوزل ( أكثر خطوه بتستهلك وقت)انا اخد مني تقريبا 5 شهور من كتابة لتعديل لمراجعة عشان كدا مهم جدا تختارو مشرف كويس وتكونو علي اتصال معاهو دايما .
    5. بعد اختيار الجامعة والاتفاق مع المشرف وتجيزالبربوزال تطلبي يرسلو ليك خطاب قبول مبدئي بتلقي صيغة الخطاب في فورم التقديم .ترسلي صورة من الخطاب للمشرف عشان يملاهم بنفس الطريقة بتاعة ناس المنحة ويمضي علي الخطاب ويرسلو ليك
    6. خطابين توصية من 2 دكاترة درسوك او اشرفو عليك في البكالريوس او الماستر و الخطوه ديه ما صعبة لكن بتسهلك وقت والدكاترة مافاضين وكمية من الطلبة بيجو عايزين خطابة توصية .المهم انتي من بدري تكلميهم وممكن تعملي ليه صيغية هو يعدل عليه المهم يعرف انك جادة في الموضوع.انا والله 3شهور جارية وراء خطابات التوصية في دكاترة ممتازين والحق يقال بيرحبو طوالي ويكتبو ليك . وفي منهم واحد يقول لي رسلي في الايميل ومرات امشي ليه المكتب وارجع بدون فايدة لكن لما شافو اني مصرة في الاخير كتبه لي.المهم الاستعداد كم بدري .لان المرة الاولي برضو واجهت المشكلة دي
    7. خطاب توصية من المشرف الحالي عليك
    8. في حالة انك اخترتي المنحة الجزئية مطلوب منك خطاب عدم مانعة من الجامعة الانتي مسجلة فيه في السودان انهم موافقين انك تعملي جزء من البحث بتاعك في المعهد المضيف
    9. خطاب توصية من مديرك في الشغل او عميد الكلية لو كنتي staff في الجامعة
    الخطاب كلهم بتلقي في ليها مثال مع فورم التقديم
    10. لستة بالأبحاث السابقة المنشورة إن وجد
    انا لما قدمت كنت لسة ما نشرت اي بحث.انتو لسه عندكم زمن ممكن تبدو في نشر بحوثكم .اكيد كل واحدة علي الاقل عندها بحث الماستر .موضوع النشر ما صعب ابدو فيه
    11. السيرة الذاتية و يفضل انها تكون في شكل europass form, فيها كل التفاصيل الدرسية والمهنية والمشاركات وأي جائزة او شهادة تشريفية حصلتي عليها مسبقا
    المرحلة الثانية التقديم أونلاين
    بعد تجهزو الحاجات دي تنزول فورم التقديم من الموقع وتملوه وترسلو في ايميل المنحة ومعاهو المستندات المطلوب وصورة من الجواز وصورة شخصية
    دي كل الحاجات المطوبة ممكن تكون كتير لكن ماصعبة اعملو جدول لك مرحلة وابدو خططو من هسة وبالتوفيق .ياريت اكون قدرت وصلت المعلومة بطريقة كويسة.

      الوقت/التاريخ الآن هو الخميس نوفمبر 23, 2017 1:53 am