منــــــــــــــتدى ليـــــــــــــــــــــالي

منــــــــــــــتدى ليـــــــــــــــــــــالي

منتدى ﻧﺴﺎﺋﻲ ﻳﻬﺘﻢ ﺑﺸﺌﻮﻥ ﺍﻟﻤﺮﺃﺓ ﺍﻟﻌﺮﺑﻴﺔ ﺑﺸﻜﻞ ﻋﺎﻡ ﻭﺍﻟﻤﺮﺃﺓ ﺍﻟﺴﻮﺩﺍﻧﻴﺔ ﺑﺸﻜﻞ ﺧﺎﺹ ﻭﻳﻐﻄﻲ ﻛﺎﻓﺔ ﺇﺣﺘﻴﺎﺟﺎﺗﻬﺎ ﻣﻦ ﻧﺎﺣﻴﺔ ﺍﻟﺜﻘﺎﻓﺔ ﻭﺍﻟﻌﺎﺩﺍﺕ ﻭﺍﻟﺘﻘﺎﻟﻴﺪ ﻭﺍﻟﺘﻮﻋﻴﺔ ﺍﻟﺼﺤﻴﺔ


    قروب مستخدمات زبدة الشيا الخام

    شاطر

    سندس

    عدد المساهمات : 11
    تاريخ التسجيل : 01/11/2012

    قروب مستخدمات زبدة الشيا الخام

    مُساهمة من طرف سندس في الإثنين فبراير 10, 2014 12:41 am

    ازيكم يا حلوات ويا مجيهات ، طبعاً أنا ما في حاجة حيرتني زي زبدة الشيا الخام دي ، مع اي حاجة بتظبط

    أنا طبعاً طلعت آخر من يعلم ، أتاري القيامة قايمة والناس كلها عارفاها إلا أنا ، بالمناسبة أنا عرفتها صدفة كنت

    حايمة في النت  لقيت العجب يا بنات ، للشعر ، للجسم ، للدخان ، للوش لعلامات تمدد الجلد بعد الولادة حاجات كتيرة ، ما صدقت لقيت عاملين لينا

    مندوبة في مدني جري عليها ، الكلام ده ليهو زي اربعة يوم كده عملت منها لشعري وجسمي ووشي :

    (1) للشعر لخبطتها مع دهن سنام الابل وزيت الزيتون بصراحة شعري لمن عجبني حسيت سبيبتو بقت ناعمة وحلوة .

    (2) للجسم لخبطت معاهو باقي زجاجة زيت اللوز مر وفازلين زبدة الكاكاو ، جسمي بقى ناعم ولوني لمن عجبني قالو لي النتيجة بتظهر بعد عشرة يوم ما قادرة انتظر

    (3) للوش مستحتها خام وشي بقى مشدود وناعم ووملمسو بقى عاجبني وبدأ شوية يفتح

    أديت منها صاحبتي إستخدمتها للدخان شايفاها مبسوطة منها شديد جسمها بقي ناعم ولونو حلو

    عشان كده قلت أعمل التجمع ده أي واحدة إستخدمتها تجي تورينا إستخدمتها لي شنو وكيف وعملت معاها شنو ، دايرة البوست ده يبقى مرجع للمجيهات

    سمراء

    عدد المساهمات : 14
    تاريخ التسجيل : 01/11/2012

    رد: قروب مستخدمات زبدة الشيا الخام

    مُساهمة من طرف سمراء في الإثنين فبراير 10, 2014 10:56 am

    ازيك سندس انا اول واحدة حاشارك معاك في البوست دا عشان كدا مفروض تديني مكافاة  Laughing Laughing Laughing 
    والله الجيهه دى احلا منها مافي .لي 10 شهور غبشة شديدة اصلا السنة دى من حزن لحزن  بس الاسبوع  الفات لميت في ذبدة الشيا (جابتها لي قريبتي من الامارت هدية)
    قمت اتنفضت ليك وجدعت علب الكريمات الكملت قروشي بدون  فايدة وجبت رحالتى المركونة ليها زمن  وشملتى  وطلعت حطبى وغسلتو ولعتها وهدى قعدة لمن اتكيفت من نفسي

    وهسه ريحتى  رهيييييييبه واثغه من نفسى لو دخلت الحمام وطلعت بخلى ريحت الحمام رهيييبة اها استمريت فى البرنامج دا 5ايام وبعد داك جبت دلكتى وبقيت اعرك عشان اطلعو والله فى اثناء ما بعرك لقيت لونى دا رهييييب ونضيف
    انا يادوب حسيت انى بقيت مرا هههههه  والحاله لسه ما شلت بالحلاوة ماعارفه بعد الشيل ح يبقى كيف

    يلا ننشط بعض على الدخان والجيهه  يلا اى واحدة تولع حفرتا وتجى تحكى لينا

    سارة

    عدد المساهمات : 15
    تاريخ التسجيل : 01/11/2012

    رد: قروب مستخدمات زبدة الشيا الخام

    مُساهمة من طرف سارة في الثلاثاء فبراير 11, 2014 1:16 pm

    انتظروني انا ذاتي معاكم
    دايرة ابدأ خلطة بياض الثلج وكمان موضوع الدخان بذبدة الشيا عاجبني ياسمراء لكن ماعارفة اجيبها من وين وروني لاني خلاص تعبت
    بالجد ياسندس نفعت معاك لونفعت معاي ليك هدية سمممممممممحة
    سمراء اها الدخان دا كيف مع خلطة بياض الثلج ما شكلهم جاين مع بعض


    _________________

    سمراء

    عدد المساهمات : 14
    تاريخ التسجيل : 01/11/2012

    رد: قروب مستخدمات زبدة الشيا الخام

    مُساهمة من طرف سمراء في الثلاثاء فبراير 11, 2014 4:15 pm

    مساء الجيه والجمال
    ياسارة انا ادخنت في الاول وطلعت الدخان لكن لسه ما شلت جسمي داير اعمل خلطة بياض الثلج في الاول وبعد داك اشيل بالحلاوة


    _________________

    سلمى

    عدد المساهمات : 14
    تاريخ التسجيل : 02/11/2012

    رد: قروب مستخدمات زبدة الشيا الخام

    مُساهمة من طرف سلمى في الثلاثاء فبراير 11, 2014 8:56 pm

    تيت تيت انا جيت
    انا بستعمل الزبدة لي اكتر من سنة تقريبا والله ماشة معاي حلوة شديد ومستحيل استغني عنها ابدا حاوريكم انا بستعملها كيف


    دي الزبدة

    انا استعملتها للهالات والجسم

    بخصوص الهالات وخطوط العين حطيت لي في علبه صغيره زبده خام وكل ليل قبل النوم بمسح تحت عيوني وفوقها ووشي كلو

    اما بخصوص جسمي فسويت لي خلطه خلطه خراافيه ما ببدلها ابدا ترطيب و نعومه و توحيد لون و شد للجسم
    ما بتصدقو الا تجربوها وحتعرفو اني ما ببالغ

    للخلطه مكوناتها
    زبده الشيا ربع كيلو + علبة زبدة كاكاو بالمرز+فنجان زيت زيتون+فنجان زيت جنين القمح+10 كبسولات فيتامينE

    ختيت زبدة الكاكاو في حمام مائي لحدي ما دابت كلها وضيفت ليها الزيوت و الكبسولات فتحتها واخدت الزيت اللي فيها وخلط كلها سوا وختيتها في علبة
    الكميه بتكفي تقريبا اكثر من ثلاتة شهور

    دا شكل الخلطة


    طريقة استخدامي :
    قبل استحم بساعتين ادهن جسمي بخلطة صابونية عاملاها براي بنزل ليكم وصفتها (ان شاء الله ) واستحم بالليفة المغربية وبعد الحمام بتمسح بخلطة الزبده وما بكترها لان كميه صغيرهبتكفي الجسم كله ترطييبهااا خطيييييييييييييييير والبشرة بتتشربها بسرعة مايبقى لها اثر ولا ريحة والنتيجه بتظهر من اول استخداام النعووووووووومه زي بشرة الاطفال

    وهسه الخلطة دي بقد معتمده في اسرتنا امي واخواتي ونسوان اخواني بقوا يستخدمونها لما شافوا نتايجها
    دي تجربتي بتمنى تستفيدون منها ذي ما استفدت انا
    avatar
    بت ام درمان

    عدد المساهمات : 28
    تاريخ التسجيل : 02/11/2012

    رد: قروب مستخدمات زبدة الشيا الخام

    مُساهمة من طرف بت ام درمان في الثلاثاء فبراير 11, 2014 9:54 pm

    سلمي وسندس نحن برانا الصاحين ولا شنو
    avatar
    بت ام درمان

    عدد المساهمات : 28
    تاريخ التسجيل : 02/11/2012

    رد: قروب مستخدمات زبدة الشيا الخام

    مُساهمة من طرف بت ام درمان في الثلاثاء فبراير 11, 2014 10:03 pm

    يا جماعة مالكم نازلين جيهة شديدة كدا
    العيد قرب ولا شنو
    انا غايتو بمشي قروب خلطة بياض الثلج ما بقدر علي الذبدة دي
    avatar
    سماح

    عدد المساهمات : 17
    تاريخ التسجيل : 01/11/2012

    رد: قروب مستخدمات زبدة الشيا الخام

    مُساهمة من طرف سماح في الأربعاء فبراير 12, 2014 7:53 pm

    كيفكم يا مجيهات

    اليوم قررت انزل تجربتي بزبدة الشيا من زمان وانا عايزة لي منتدي بلغتنا السودانية الحلوة عشان الزول يكتب براحة وحرية

    انا ياجماعة ماخليت صيدلية ولا بتاع خلطات ما مشيت ليهو

    كريم وش, كريم لسواد, تحت العيون, كريم يدين, كريم رجلين, كريم جسم, كريم لشفايف كريم مفتح, شي للرموش حمامات زيت كريم يعني ماخليت حاجة من بالجد تعبت
    لحدي ما قريت عن زبدة الشيا وقررت اشتريها (انا رسلت جبتها من السعوية) لكن هسه شايفة في ناس بقت تجيبها في السودان ياريت ياسندس تدينا عنوانهم

    معليش طولت في الكلام

    نبدا بسم الله بطريقه اول شي جسمي بعد الحمام بمسحه بزيت بيبي جونسن مع زبدة الشيا وعشان الريحه بخلط معه مسك سائل

    والنتيجة جسم ناعم يلمع يدين و رجلين ذي القطن حرير

    وللوش خلطة زبدة الشيا مع زيت جنين القمح قبل النوم اغسل وشي وامسح ماء ورد وامسح الخلطة في وشي كلو تحت عيوني وشفايفي ورقبتي



    النتيجه وش مورد وناااااااااااعم ومشدودز شفايف تفتح النفس والهلات السوداء خفت كتير
    تخريمة
    راجلي مستغرب من عدم مشيتي للصيدلية وبقى يسالني ما دايرة حاجة من الصيدلية
    مع انو ملاحظ للتغير لكن ما عارف الحاصل شنو
    اصلي مابوريهو  Rolling Eyes  Rolling Eyes 

    سندس

    عدد المساهمات : 11
    تاريخ التسجيل : 01/11/2012

    رد: قروب مستخدمات زبدة الشيا الخام

    مُساهمة من طرف سندس في الأربعاء مارس 12, 2014 9:39 am

    كيفكم يا جماعة
    الله يقطع الامتحانات
    يداب شمينا الهوا
    بشتنة شديدة
    دايرين برنامج جيهة من جديد يلا نشجع بعض
    انا غايتو بعدين دايرة ابدا الدخان

    سلمى

    عدد المساهمات : 14
    تاريخ التسجيل : 02/11/2012

    رد: قروب مستخدمات زبدة الشيا الخام

    مُساهمة من طرف سلمى في الإثنين مايو 19, 2014 7:07 pm

    سلام ياستات الذوق
    دايرين نبدا نضافة
    المناسبات كتيرة الايام دي وكدا
    برنامجي
    للوش جبت كريم قارنيه ولخبطة معاهو شوية من زبدة الشيا
    وللشعر دايرة اعمل كركار زبدة الشيا (شلت الفكرة من هنا كانت نزلتها الاخت سحر)
    لجسمسي نفس الخلطة الوريتكم ليها زمان
    يلااااااااااااااااااااااااااااااا سيبو الكسل منو معاي






    العابده

    عدد المساهمات : 1
    تاريخ التسجيل : 06/12/2014

    رد: قروب مستخدمات زبدة الشيا الخام

    مُساهمة من طرف العابده في السبت ديسمبر 06, 2014 2:32 am

    ازيكم يا مجيهات. صراحه انا مفروض عرسي قريب ان شاءالله دعواتكم وسمعت عن موضوع زبده الشيا. طيب للاستعملوها الأفضل ياتو وحده الآي فوري اللونها كريمي ولا الصفراء بالذات مع الدخان. ردو سرييييييع العرس بعد شهر والحاله انسووووو
    avatar
    سماح

    عدد المساهمات : 17
    تاريخ التسجيل : 01/11/2012

    رد: قروب مستخدمات زبدة الشيا الخام

    مُساهمة من طرف سماح في الثلاثاء ديسمبر 09, 2014 11:48 am

    العابده كتب:ازيكم يا مجيهات. صراحه انا مفروض عرسي قريب ان شاءالله دعواتكم وسمعت عن موضوع زبده الشيا. طيب للاستعملوها الأفضل ياتو وحده الآي فوري اللونها كريمي ولا الصفراء بالذات مع الدخان. ردو سرييييييع العرس بعد شهر والحاله انسووووو
    الف مبروك يالعابدة وربنا يتم ليك علي خير
    شهر كافي جدا انك تتظبطي للعرس بس اجتهدي وماتكسلي
    بالنسبة للذبدة الصفرا هي الكويسة ومفعولها سحري وسريع كمان
    انا جربت كل الاوان والانواع من الزبدة ومن كل الشركات لقيت الصفرا هي الاحسن
    كمان البتجي خام دي رهيبة شديد ومافيها اي اضافات ومركزة شديد كمية بسيطة منها بتكفي
    ان شاء الله اكون افدتك
    والف مبروك تاني


    _________________

    Ruzza

    عدد المساهمات : 1
    تاريخ التسجيل : 14/03/2015

    رد: قروب مستخدمات زبدة الشيا الخام

    مُساهمة من طرف Ruzza في السبت مارس 14, 2015 6:05 pm

    مساء الخير كيفكم يا بنات و سيدات انا عضو جديدة معاكم ..
    دخلت وشفت كلامكم عن زبدة الشيا.. انا لي شهور بستعملها من وقت ما سمعت بيها و جربتها ايام العرس و التحضيرات بالجد هو منتج سحري شديد بعدها بقيت أقرأ كتير عنه و في معلومات كتيرة عنه لو دخلتو و قريتو.. بعدين ما عنده أي أضرار جانبية أو مشاكل طول استخدام .. ما أطول عليكم انا تجربتي معاه في شعري مع زيت اللوز و زيت الزيتون بخلطو معاهم و بستعملو في شعري يومي بالتسريح وفعلا شعري بدأ يغزر.. في الوش بغسل وشي بي صابونة زبدة الشيا و أمسح منه في كل الوجه خام بدون أي إضافة .. و بديت هسي استخدمو مع الدخان بتمسح بيهو و بقعد في الدخان و بعد ستة أيام بفرك جسمي بالدلكة شغالة كده غايتو و شايفة لون حلو مع بشرة ناعمة.. و نصيحة الدخان دي أخدتها من صديقة جربتها هي وانا لاحظت فرق شاسع في لونها و بشرتها بعد تلاتة شهور بس ..واصلو عليهو منتج طبيعي واستغنو عن الخلطات الكيميائية المافيها فائدة و بتضر و فوائدها لي زمن محدد..
    بالمناسبة دي انا بجيب الزبدة الخام من جنوب افريقيا والكاميرون وغانا وأفريقيا الوسطى ولو حابين تشترو أو بتعرفو ناس عايزين ممكن تتصلو بي أو ترسلو لي رسالة هنا ..

      الوقت/التاريخ الآن هو الثلاثاء أكتوبر 16, 2018 4:54 pm